Meyit qüslünün şərtləri

Məsələ 683. Meyit qüslünün bir sıra şərtləri vardır. O cümlədən:

• qüsl qəsdi-qürbət (Allaha yaxınlaşmaq niyyəti) və ixlasla edilməlidir;
• qüsl suyu pak olmalı və vacib ehtiyata əsasən, irin kimi insanın iyrəndiyi şeylərə bulaşmış olmamalıdır;
• qüsl suyu, sidr və kafur qəsb edilmiş olmamalıdır;
• qüsl əzalarında suyun təmasının qarşısını ala biləcək bir maneə olmamalıdır;
• meyitin bədən üzvləri özlüyündə nəcis sayılan şeylərdən (idrar, nəcis və qan kimi) təmizlənməlidir;
• qüsl cəsədin dağılmasına səbəb olmamalıdır;
• qüsl meyitin şəri vəlisinin icazəsi ilə edilməlidir;
• qüslü icra edən şəxs lazımi şərtlərə cavab verməlidir.

Məsələ 684. Meyitə qüsl etmək üçün muzd almaq, lazım ehtiyata əsasən, haramdır və əgər bir şəxs qəsdi-qürbətlə uzlaşmayacaq şəkildə muzd almaq üçün meyitə qüsl edərsə, həmin qüsl batildir. Lakin qüslə hazırlıq işləri müqabilində muzd almaq haram deyil.

Məsələ 685. Qüslü yerinə yetirən şəxs qüsl suyunun meyitin bütün üzvlərini yuduğuna dair yəqinlik və ya arxayınlıq hasil etməlidir. Əgər meyitin üzvlərində plastır, boya, lak kimi suyun dəriyə toxunmasına mane olan bir şey olarsa, qüsldən əvvəl və ya qüsl əsnasında aradan qaldırılmalıdır.

Məsələ 686. Əgər meyitin üzvlərində qan kimi nəcis olub suyun bədənlə təmasına maneə hesab edilən bir şey varsa, qüsldən əvvəl təmizlənməlidir.

Meyit qüslünü icra edən şəxs üçün şərtlər

Məsələ 687. Meyiti qüsl edən şəxs aqil, müsəlman, meyitin həmcinsi olmalı və qüsl məsələlərini bilməlidir. Vacib ehtiyata əsasən isnaəşəri şiə olmalıdır.

Məsələ 688. Kişi naməhrəm qadına meyit qüslü edə bilməz və qadın da naməhrəm kişiyə meyit qüslü edə bilməz.

Məsələ 689. Əgər meyitin həmcinsi olan isnaəşəri şiə tapılarsa, vacib ehtiyata əsasən məhrəmlər onu qüsl etməməlidir.

Məsələ 690. Kişi müməyyiz olmayan qız uşağına, qadın isə müməyyiz olmayan oğlan uşağına meyit qüslü edə bilər. Müstəhəb ehtiyata əsasən uşaq 3 yaşdan böyük olmamalıdır.

Məsələ 691. Ər-arvad bir-birinə meyit qüslü edə bilər.

Məsələ 692. Meyitin məhrəm yerlərinə baxmaq haramdır. Lakin bu, qüslü batil etmir.

Məsələ 693. Meyitin məhrəm yerləri istisna olmaqla bədəninin başqa yerlərinin açıq olması caizdir, lakin daha yaxşı olar ki, paltar altından qüsl edilsin.

Məsələ 694. Müməyyiz bir uşaq meyit qüslünü düzgün qaydada yerinə yetirə bilərsə, onun etdiyi qüsl kafidir.

Meyit qüslünün icrası qaydaları

Məsələ 695. Meyitə aşağıdakı ardıcıllıqla üç qüsl etmək vacibdir:

1. sidr qarışdırılmış su ilə
2. kafur qarışdırılmış su ilə
3. saf su ilə

Məsələ 696. Meyit qüslü cənabət qüslü kimidir və vacib ehtiyata əsasən tərtibi qaydada edilməlidir.

Məsələ 697. Sidr və kafur suyu çox və ya az olmamalıdır.

Məsələ 698. Əgər sidr və kafur az olarsa, əldə edilən miqdarda istifadə edilməlidir.

Məsələ 699. Əgər sidr və ya kafur tapılmazsa, onların yerinə saf su ilə qüsl verilir və vacib ehtiyata əsasən meyitə bir dəfə təyəmmüm də edilir.

Məsələ 700. Ehram halında vəfat edən şəxsin qüslündə kafurlu su istifadə edilmir.

Məsələ 701. Heyz və ya cənabət halında ölən şəxs üçün ayrıca qüsl lazım deyil; meyit qüslü kifayətdir.

Məsələ 702. Vacib ehtiyata əsasən meyitin dırnaqları tutulmamalı və tükləri qırxılmamalıdır.

Məsələ 703. Meyit sağlığında sünnətsiz idisə, ölümündən sonra sünnət etmək caiz deyil.

Məsələ 704. Bəzi hərəkətlər meyit qüslünün müstəhəb və məkruh işləri kimi fiqh kitablarında qeyd olunmuşdur.